نصيحة

نصيحة

لو يوم صادفك سوء الحظ
أوعى تطاطى أو تتهز
أوعى تيأس وتحس بعجز
أديها الطرشة وقولها طظ

أوعى تحس أنك مهزوم
فشلك لحظة مش حيدوم
بكرة أكيد مس زى اليوم
أمسح دمعك يلا وقوم

لو محروم من الحنان والعطف
لو مركون دايما ...على الرف
لو كل الدنيا قالت لك ..... أف
حاول مرة .. وعشرة .... وألف

لو محروم من حضن الأم
لو مش لاقى حضن يضم
لو حسيت بجحود أو ظلم
عيش بالحب وجرحك لم

نظم حياتك وأبدأ خطوة
حقق بيها اللى فى نفسك
غمض عينك وأحلم وأحلم
يمكن بكرة تحقق حلمك

لو مش قادر تسعد ولدك
لو حسيت بالغربة ف بلدك
لو طبيت ومحدش سندك
أوعى تخلى اليأس يهدك

لو يوم ضاقت بيك الدار
لو حسيت جواك بالنار
ولقيت نفسك فى التيار
إياك تبكى أو تنهار

لو قاعد أيدك على خدك
ودموعك طوفان بيهدك
لا جار ولا صاحب بيودك
أوعى الظلم يكسر قلبك

لو حسيت أنك مخنوق
بلهيب الأسعار محروق
ومرتب فيه كام مدعوق
خلى أملك نجاة وطوق

عمر الغنى ما كان بالمال
ولا العزوة كتر العيال
الغنى فى النفس حلال
والصحة فى راحة البال

غمض عينك وأحلم وأحلم
يمكن بكرة تحقق حلمك
وأن ما سعفك بكرة ما تندم
يمكن بكرة تشوفه فى أبنك

تحياتي للجميع

لا شكرا على واجب

انا اللي لازم اشكركم

نورتما الصفحة بمروركما الطيب

وتشجيعاتكم الدائمة

شكرا لكي اختي

موضوع رائع و نصائح اروع

لا تحرمينا من جديدك